Plantun de Prouvènço

Pèr coumpara dos planto d'encò nostre

Knautia integrifolia & Typha domingensis

Knautia integrifolia

Caprifoliaceae Dipsacaceae

Noms en français : Knautie à feuilles entières, Knautie hybride.

Descripcioun :
Aquesto camiho es uno planto de l'an que trachis dins li relarg caud de Prouvènço. Es uno planto pelouso que se recounèis à si fueio entiero au contro de sa cousino, la flour-de-la-véuso. A pas nimai de rouseto basalo esterlo. Regardas peréu que i'ague ges (o quàsi) de dènt au "calice", au mitan di péu, dóu jouine fru. Coumpara emé la flour-de-la-véuso que ié sèmblo.

Usanço :
Li jóuini fueio e li boutoun de flour soun manjado cuecho en Crèto, e se vèndon meme sus li marca (F. Couplan, op.cit. p. 448).

Port : Grando erbo
Taio : 15 à 150 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Knautia
Famiho : Caprifoliaceae
Famiho classico : Dipsacaceae

Ordre : Dipsacales

Coulour de la flour : Vióuleto
Petalo : 4
Ø (o loungour) enflourejado : 2 à 3 cm
Flourido : Printèms

Sòu : Ca
Autour basso e auto : 0 à 800 m
Aparado : Noun
Mai à jun

Liò : Champ - Ermas - Escoumbre e proche dis oustau - Camin
Estànci : Termoumediterran à Coulinen
Couroulougi : Estenoumediterrano-Nord
Ref. sc. : Knautia integrifolia (L.) Bertol., 1836

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.